無經驗轉行做IT，履歷應該點寫先有人請？

我三年前都係咁樣轉行。重點唔好淨係寫「識Python」，要放你自己做過嘅project上去，就算係練習作品都放埋GitHub連結。我當年做咗個簡單嘅記帳網頁，面試時可以有嘢傾。另外初級位真係要海投，我投咗成八十間先有三個面試，唔好個月無人覆就灰。JobsDB同LinkedIn都要開，有啲公司只放其中一邊。

履歷要為每份工微調關鍵字，好多大公司用系統篩，你JD有寫嘅字眼你履歷都要有。我試過同一份履歷改咗排版同用詞，覆我嘅比例即刻高咗。另外可以睇下ERB或者一啲政府資助課程，有啲會夾埋實習，比自己盲摸摸投好多。轉行頭一兩年人工會低啲，心理上要有準備，捱過就上返。