細路成日喊住要買玩具,喺商場扭計,做家長點處理?

我用另一招,俾少少選擇權佢。我會同個仔講,如果佢想要,可以儲印仔或者做好啲家務,儲夠先換,等佢明白嘢唔係喊就有。喺商場扭計嗰陣,我會帶佢離開個現場,搵個位坐低俾佢冷靜,唔喺人堆度硬碰。細路其實好多時係攰或者肚餓先扭計,你留意下係咪呢啲原因。最緊要係唔好覺得尷尬就即刻掏銀包,長遠對佢價值觀唔好。每個細路唔同,多試幾種方法搵啱佢嗰套。

我兩個女都經歷過呢個階段。我嘅經驗係一妥協買咗,佢就學識喊=有玩具,以後更難搞。我哋而家出門前會講清楚今日唔買玩具,或者話生日先買,講咗就要企硬。佢喊嘅時候我會蹲低同佢講我明佢想要,但今日真係唔買,語氣平靜唔鬧佢。頭幾次好難捱,但堅持咗幾次佢就知冇用。一致好重要,唔好爸爸企硬阿媽又心軟,咁佢會搵個窿鑽。